Bomba berthamore e Shqiperise

Bomba bërthamore e Shqipërisë është një udhëtim analitik në zemër të krizave që kanë tronditur dhe po e riformësojnë shoqërinë shqiptare. Nga shpresa e madhe e dhjetorit 1990, kur fjala magjike ishte "demokracia", deri te realiteti i sotëm ku kryefjala është "demografia", ky libër analizon përplasjen mes ëndrrës europiane, krizave politike të pafundme dhe shpopullimit dramatik.
Lutfi Dervishi ndërthur reflektimin historik me analizën e realitetit aktual: Shqipëria e mbërthyer mes populizmit që i shteron energjitë dhe shpopullimit që i zbraz qytetet dhe fshatrat. Me një stil të qartë dhe shpesh therës, autori vë përballë iluzionet e tranzicionit me faktet kokëforta të statistikave, duke treguar se "bomba bërthamore" e vërtetë nuk është një armë ushtarake, por kombinimi vdekjeprurës i mungesës së shtetit ligjor, korrupsionit, emigracionit masiv dhe humbjes së besimit.
Ky libër është një thirrje për reflektim dhe veprim: për të kuptuar pse demokracia nuk e mbajti dot premtimin e saj dhe si shpopullimi po e vendos Shqipërinë përballë një krize ekzistenciale. "Bomba bërthamore e Shqipërisë" nuk është metaforë e largët, por realiteti që na rrethon çdo ditë.

Lutfi Dervishi është gazetar, analist dhe pedagog me mbi tri dekada përvojë në media dhe komunikim publik. Autor i disa librave me ese, analiza dhe satirë politike, ai njihet për stilin e kthjellët, ironinë therëse dhe aftësinë për të lidhur faktet me sfidat e sotme shoqërore. Në qendër të punës së tij mbeten demokracia, media dhe rrugëtimi europian i Shqipërisë.