Rënia e fjalës

"Rënia e fjalës" është një udhëtim përmes botës së fjalës së lirë, që shpesh duket se nuk është më as e lirë dhe as ajo që duam. Në këtë libër, Lutfi Dervishi mbledh ese, reflektime dhe satirë për rolin e fjalës në shoqërinë shqiptare dhe më gjerë. Nga rrjetet sociale te politika, nga gjykimet virtuale te heshtjet publike, ky libër shtron pyetjen e madhe: a ka humbur fjala fuqinë për të ndryshuar botën?
Me stil të mprehtë dhe ironi të hollë, autori na çon në gjashtë kapituj ku fjala shihet si armë, si lodër, si maskë dhe si viktimë. Lexuesi do të gjejë histori, shembuj dhe raste studimore që shpalosin absurditetin e realitetit tonë, por edhe nevojën për ta mbrojtur fjalën nga banalizimi dhe shpërdorimi.
Ky libër nuk është thjesht një përmbledhje shkrimesh, por një thirrje për reflektim mbi lirinë e shprehjes dhe rolin e medias në një shoqëri që shpesh harron se fjala është themeli i demokracisë.

Lutfi Dervishi është gazetar dhe autor që njihet për satirën therëse dhe ironinë e hollë. Librat e tij pasqyrojnë shoqërinë shqiptare me humor e reflektim, duke e kthyer absurditetin e përditshëm në tregime që të bëjnë të qeshësh e të mendosh. Me "Kur të gjithë ishim në arrest shtëpie" ai sjell një panoramë satirike të kohës së pandemisë, ku sapuni, maska dhe Netflix u bënë armët tona kryesore.